အရဟံအစ ဘဂဝါအဆုံး၊ တုနှိုင်းမမြင် မုနိအရှင်နှင့်တကွ ဓမ္မဂုဏ်ရည် အလီလီညွတ်တွား မြတ်ဘုရားသာသနာ မြတ်သံဃာတို့အား ဦး ထိပ်ထားပြီးသကာလ၊ န-အ-ဖ အောက်ဆွဲတသင်း သောက်တလွဲအဖျင်းတွေအား၊ နောင်အခါလေ ထပ်မမိုက်မိရလေအောင်၊ ပြောင် လျှာရှေ (ရှည်) ဇာတ်လိုက်ကျော်တို့က အောင်ပါစေသီချင်းအော်ရင်း အပီဗျင်း .. (အဲလေ.. ယောင်လို့) ဆုံးမပါတော့မယ် ပရိတ်သတ်ရေ…။
ဘလော့ဖတ်သူအပေါင်းတို့ရေ .. ပြောင်လျှာရှည်ဇာတ် တစ်ပတ်နှစ်ပတ် လစ်ဟာသွားတာမို့ အပြတ်ဆိုပြီး အပြစ်ဘယာမပွားဘဲ ချစ်စရာ ဇာတ်လိုက်ကျော်နှစ်ဦးကို မေတ္တာပိုကာ ထားတော်မူကြပါဦးနော်..။ မေတ္တာဆိုတာ..ရတနာတစ်ပါးပါခင်ဗျ။ ဤကမ္ဘာမှာနအဖတဖွဲ့လုံးက လွဲ ကျန်တဲ့.. လူလည်းနားလည်၊ နတ်လည်းနားလည်၊ ခွေးတောင် နားလည်ပါတယ်ခင်ဗျ။ ဝန်တိုဣသ အဘိဇာဒေါသ ဘဝကိုပြာကျစေတဲ့ မီးခဲကြီးတွေကို ခံတွင်းမှာငုံ၊ အတင်းကိုလူအရေခြုံထားတဲ့ နအဖ ခွေးပျက်တသိုက်ဟာ မိုက်ဇာတ်ခင်းပြီးရင်ခင်း၊ အဝီစိ ဆင်းပြီးရင်း ဆင်းနေတဲ့ အရှိန်ကို မြတ်ဘုရားဂေါတမတောင်မှ တားနိုင်ပါတော့မလား ..... ။
ကိုင်း..ကိုင်း.. မေတ္တာအလှသဘောကို လှစ်ကာပြလို့ဟောမဲ့ ဒီတစ်ကြိမ် ဇာတ်နာမည်ကတော့ အာဠာဝက နအဖ ပါတဲ့ဗျာတို့…. (တိန်..တိန်)
သုံးလောကထွဋ်ထား ဘဂဝါရှင်ဘုရားဟာဆိုရင်ဖြင့် သတ္တဝါတွေကို အစဉ်သနားတော်မူလှပါသောကြောင့် လူနှင့်နတ်ဗြမ္မာ သတ္တဝါေ၀ နေယျကို သဗ္ဗူညုတရွှေဉာဏ်တော်ဖြင့် နိဗ္ဗာန်ကိုခေါ်တော်မူမည်ဟု ဆင်ခြင်ရှုစားတော်မူပေရာ အာဠဝီကြပ်ပြည်အတွင်း.. စိတ်ဆင်းရဲ ခြင်းများစွာနဲ့ အသက်ယဲ့ယဲ့သာကျန်၊ ရှေ့ခရီးလမ်းမကောင်းတော့တဲ့ သန်းအာဠာဝကရွှေ ဆိုတဲ့ ဘီလူးကြီးကိုမြင်တော်မူပါသတဲ့၊ အနှီ သတ္တဝါကြီးဟာ အကုသိုလ်တယ်များဆိုသကိုး၊ အလိမ်အကောက်ထူပုံကလည်း နွယ်ရှင်ကတောင်ဆလံသရပါသတဲ့ ပရိတ်သတ်ရဲ့..။ အချိန်ရှိသမျှ လိမ်ဖို့ပဲစဉ်းစားနေတော့၊ မယုံမေးကြည့် သူ့ဟိုသင်းတောင် ပုံစံပျက်နေပြီဆိုပဲ၊ ပေါင်ပြောတာ ..။
“ ဟဲလို ဂွတ်မောနင်း ကိုယ်စားလှယ်တော်ကြီးမစ္စတာဂမ်မာတလိ .. ကြပ်ဘီလူးပြည်မှာကျုပ်ခိုင်းလွှတ်လိုက်တဲ့ အရေးကိစ္စ အောင်မြင် ခဲ့ပါရဲ့လား .. သန်းအာဠာဝကရွှေ ဆိုတဲ့ ဘီလူးကြီးနဲ့ရော .. တွေ့ဆုံခွင့်ရခဲ့ရဲ့လား..”
“ ပြောမကောင်းပါဘူး နတ်ကုလသမဂ္ဂအတွင်းရေးမှူးချုပ် မစ္စတာ ဘန်ကီဝိသကြုံခင်ဗျာ..။ ကျနော်သူ့ကို လေးရက်တိုင်တိုင် စောင့်ပါ တယ်။ မအားဘူး၊ အလုပ်များနေတယ်ဆိုပဲဗျာ၊ အဲဒါကြောင့် ကျနော်အလုပ်မဖြစ်ပဲ ပြန်လှည့်ခဲ့ရကြောင်းပါ။ ”
“ ဪ.. ခက်ပါဘိတော့.. ကိုယ်စားလှယ်တော်ကြီးရယ်၊ ဒင်းဟာ လုပ်ချင်တာလုပ်၊ ထင်တိုင်းကြဲ၊ လူသတ်၊ သာသနာစော်ကားပြီးမှ.. မဖြေရှင်းရဲတော့တာလား၊ ”
“ အင်း .. တကယ့် ဘီလူးရှုပ်ကြီးပါဗျာ။ ပြီးခဲ့တဲ့ကိစ္စအတွက် တာဝန်ယူမဖြေရှင်းပေးတဲ့အပြင်၊ ဆက်ကာဆက်ကာ မိုက်လုံးကြီးနေပါ ရောလား ..၊ ”
အဲသလို သန်းအာဠာဝကရွှေတို့သတင်း စင်္ကြာဝဠာတခွင်သင်းနေပုံများပြောပါတယ်။
ဟော .. ဒီလိုနဲ့ တစ်နေ့ကျတော့ နတ်သဘင် အစည်းဝေးကို ဘီလူးကြီးသန်းအာဠဝကရွှေ တက်ရပါရောလား.. မသွားခင် ဗိမာန် ပျောက်မှာစိုးလို့ အပါးတော်မြဲတွေကို ဒီလို.. ဒီလို မှာခဲ့ရသေးတယ်။
“ ဟဲ့ .. မြင့်ယက္ခလှိုင်တို့ ၊ ရွှေယက္ခမန်းတို့ .. ငါ.. ဝတိ ံအထက်တခွင်မှာ ညီလာခံသဘင် သွားတက်ရလိမ့်မယ်ကွယ့်၊ ငါမရှိတုန်း..၊ တွေ့ သမျှ သတ္တဝါတွေ သိမ်းကြုံးစားမနေနဲ့ဦး၊ အခြေအနေကသိပ်ကောင်းတာ မဟုတ်ဘူး၊ နဲနဲလျှော့ကြ၊ နို့မို့ ငါတို့ဗိမာန်ပျောက်လိမ့်မယ်။ ကဲ .. အချိန်မနှောင်းခင် MAI လေကြောင်းနဲ့ နှင်ရဦးမယ်၊ ….. ဝေါ ဝေါ ဝေါ … ”
အဲဒီအချိန်အခိုက်အတန့်လေးမှာပဲ ဗုဒ္ဓမြတ်စွာဘုရားရှင် ကိုယ်တော်မြတ်ကြီးဟာ အာဠဝီကြပ်ပြည်က သန်းအာဠာဝကရွှေရဲ့ ဗိမာန်အတွင်း ကြွရောက်ပြီး ထက်ဝယ်ဖွဲ့ခွေ စံနေတော်မူပါသတဲ့ ပရိတ်သတ်ရေ..၊ သန်းအာဠာဝကရွှေရဲ့ နောက်လိုက် ဘီလူးဗိုလ်ချုပ်တသိုက်ဟာ ဘီလူးချုပ်ကြီးမှာကြားချက်ကို သိသော်လည်း၊ ဘုရားရှင်ဆိုတော့ နှင်ဝံ့တဲ့ အစွမ်းမရှိကြ။ အီးမှန်တဲ့ မျက်နှာပေးကိုယ်စီနဲ့ မအီမသာ ခစားနေကြရရှာသတဲ့။ သို့သော်လည်း၊ အစည်းအဝေးတက်ဖို့ လေဆိပ်ဆင်းလာတဲ့ ဘီလူးချုပ်နှစ်ဦးက ဘုရားရှင်ဝင်ရောက်စံမြန်းတော် မူနေတဲ့ သန်းအာဠာဝကရွှေရဲ့ ဗိမာန်ကိုမြင်တော့ တိုးတိုးလေး သတင်းပို့ရှာသတဲ့ …။
“ ဘီလူးချုပ်ကြီးခင်ဗျာ..၊ ဗိမာန်အတွင်း ရဟန်းကြီး ဂေါတမ ဝင်ရောက်သတင်းသုံးတော်မူနေတယ် ခင်ဗျ .. ”
“ ဘာ .. ဘယ်လို .. ”
(ဒန် တန် တန် ..)
“ ဟုတ်ပါတယ် .. ရဟန်းကြီးဟာ အင်မတန်ကြည်ညိုစရာ .. ရာ .. ရာ …”
“ တော် .. တန် .. တိတ် .. ”
ဆုံးအောင်တောင် နားမထောင်နိုင်၊ ဒေါသငယ်ထိပ်တက်ဆောင့်လို့ သူ့ဗိမာန် အာဠဝီကြပ်ပြည်အတွင်းချက်ချင်းရောက်ရှိသွားပါသတဲ့..။
ဘုရားရှင်ကိုယ်တော် မြတ်ကြီးရှေ့လဲရောက်ရော .. မစဉ်းစားမဆင်ခြင်၊ မြင်မြင်သမျှ ဗကပ လို့အော်ဟစ်ပြီးသကာလ၊ အနှစ်နှစ်အလလက ဂက်(စ်)ရောင်းပြီး ဝယ်စုထားရတဲ့ လက်နက်ကြီးကိုးမျိုးနဲ့ ဘုရားရှင်ကို ဆော်ပါရောဗျာ…။
“ ကဲ လာလေရော့ .. ရာရာစစ ငါ့ပြည်တွင်း ဗစ်ဇစ်ဗီဇာနဲ့ ဝင်လာတဲ့ ဂျပန်ရှုတ်… အဲလေ ယောင်လို့.. တရုတ်လက်နက်နဲ့ အဟုတ်အ သက်ထွက်စေရမယ် .. ရဟန်းကြီး သေပေရော့ … ”
“ အာခံတွင်းက ဝင်းဝင်းတောက်လျက် .. ရွှေသွားစက် ..
ရုရှားပြည်မှအကြွေးဝယ်ထား၊ တက်လျှင်ခက်၍ ဆင်းလျှင်ပျက်သည့် လေယာဉ်စက် ..
2007 စက်တင်ဘာအတွင်း တွေ့သမျှဗြင်းခဲ့၊ အဖျားကျိုးလျက် ဝါးရင်းတုတ်စက် ..
ဆီဈေးလဲတက်၊ နှိုးလျင်မထွက်၊ မနှိုးလျင်ပျက်၊ ဆင်းလျက်လျှောက်သွား ရှမ်းစတားစက် ..
မြေလွတ်မချန်၊ စိုက်ရန်ကြံ၊ တစ်ပင်ငါးရာ စိုက်ခိုင်းပါလို့ ခွေးသေးပန်းတဲ့ ကြက်ဆူစက်၊
ဘီလူးတမတ်၊ လူသုံးမတ်သား၊ စစ်ဇာတ်သွင်းမဲ့ တိုင်းပြည်ကိုဖျက် Road Map စက် ”
“ ဟင် .. ဂလောက်မရပ်မနားပဲ အသေပစ်တာတောင် အရောင်မညှိုး ငါ့လက်နက်တွေသာ ကျိုးကုန်ပါရောလား..၊ ”
“ ဟယ် .. ဘယ်လို .. ဘယ်လို မယုံနိုင်စရာပါလား .. ငါ့လက်နက်တွေဟာ ပန်းပွင့်ပန်းခိုင်တွေ ဖြစ်ကုန်ပြီ..၊ အား လား လား .. သယ်.. ”
(ရှိသမျှ အာမေဋိတ် ပရိတ်သတ်ဖိန့်အောင် ကြုံးဝါးပြီးတာနဲ့)
“ ကဲ .. ဒီတစ်ခါနောက်ဆုံးလက်နက်.. လာပြီဟေ့ .. သယ် ….. ငွေသားလက်ဆောင် အိတ်ပြည့်အောင်သိပ်၊ မကောင်းသူထိပ် ကောင်း သူထိပ်ဟု၊ မျက်စိမှိတ်ကာ စွတ်အော်ပါသည့်၊ ဂွတိုယက္ခ ဘလော့စုတ်စက် .. ”
“ အလို .. လက်နက်မှန်သမျှ ပန်းလေးတွဖြစ်ကုန်ပါရော့လား..၊ ဟယ်၊ သန်းအာဠာဝကရွှေတဲ့ ဟေ့..၊ တစ်ရွှေထဲရှိတယ်၊ နှစ်ရွှေရှိရင် ရောင်းစားမယ်ကွ၊ … အဲလေ .. ငါဘီလူးရဲ့ အထူးလက်နက်၊ လာပြီ..၊ ဘွဲ့ဖြူပုဆိုးတဲ့ဟေ့၊ အသက်ယူလို့ ဇီဝိန်ကြွေစေရမယ်၊ ဒီပုဆိုး ကိုချွတ်ပြီး၊ မြေပြင်ပေါ်ပစ်ချရင် စင်္ကြာဝဠာတစ်ခွင်၊ မီးလောင်ပြင်ဖြစ်မယ်၊ ရေပြင်ကိုပစ်ချရင် သမုဒ္ဒရာခုနှစ်စင်း ခမ်းခြောက်ကုန်မယ်..၊ လက်နက်ကြီးတွေ သင်ခံနိုင်ပေမယ့်၊ ကျုပ်ပုဆိုးဒဏ်ကိုတော့ သင့်အရိုးတောင် မကျန်စေရဘူး၊ လာလေရော့ .. ဘေးတွေ့ရော့ လ ဟယ်..”
ဟဲ .. ဟဲ .. သိတယ်ဟုတ်..၊ ဘုရားရှင်ကို ဘာမှတ်နေလဲ မသိ၊ ဘွဲ့ဖြူပုဆိုးလဲ မွမွကြေလို့ ဘီလူးကြီး သန်းအာဠာဝကရွှေသာ တန်းလန်း ကြီးဖြစ်နေသတဲ့ ... ဘွဲ့ဖြူပုဆိုးကျွတ်လို့ပါ။
“ ဟင် .. ဒုက္ခ..၊ ပုဆိုးဘ၀ ပြောင်းပြီ၊ ဟယ်.. ဒီလက်နက်တွေမနိုင်ရင် နောက်တစ်မျိုးလာမယ်၊ ညာတာပါတေး အာဝါးပေးတဲ့ တပည့် ကျော် .. ကျော်ယက္ခဆန်းရဲ့ လေပုပ်စက်တဲ့ဟေ့ …. ရဟန်းကြီး .. အသင်အခု ထွက်သွား .. ” တဲ့ဗျား..။
ဂေါတမကိုယ်တော်လဲ အသာတကြည်ထွက်တော်မူသတဲ့..။
“ သြော် .. ငါ့နှယ်နော်.. စောစောကတည်းက ပြောလိုက်ရင်ရရဲ့သားနဲ့ ခုတော့ ဂက်စ်ရောင်းပြီး ဝယ်ထားရတဲ့ လက်နက်လဲကုန်ပြီ။ ”
အဲဒါနဲ့ စမ်းပြီးထပ်ပြောပြန်တယ်။
“ ရဟန်းကြီးပြန်ဝင်ပါ .. ”
ဘုရားရှင်လဲ ပြန်ဝင်တော်မူပါသတဲ့ ..။ ဟဲ ဟဲ .. ငါဘီလူးချုပ် ဟုတ်လှချည်လားပေါ့လေ..။
အဲသလို ဘီလူးချုပ်ကြီးသန်းအာဠာဝကရွှေဟာ ဘုရားရှင်ကို သုံးကြိမ်တိတိ ပြောဆိုစော်ကားပြီးတော့မှ တွေးမိသတဲ့..။
“ ငါ တစ်ညလုံးအသေဆော်တာတောင် ရဟန်းကြီးအပြုံးမပျက်ပါလား၊ အင်း .. တစ်ခုခုတော့ တစ်ခုခုပဲ.. ”
“ အသင်ရဟန်းကြီး၊ ဘယ်နှယ့်ကြောင့် ကျွနု်ပ်အမိန့်ပေးတဲ့အတိုင်း ဆောင်ရွက်ရသနည်း၊ ”
ဘုရားရှင်ကိုယ်တော်မြတ်ကြီးက ..
“ ဤဗိမာန်ပိုင်ရှင်ကား၊ အသင်လဲ မဟုတ်၊ ငါဘုရားလဲမပိုင်၊ အရာခပ်သိမ်းကား မမြဲသောသဘောရှိပေသည်၊ အသင်ဘီလူးချုပ်မှူးကြီး၊ အခိုက်အတန့်ပိုင်ဆိုင်နေထိုင်ခွင့်ရသော နေရာတစ်ခုအတွက် အသင်ခေတ်သစ်ဘီလူးမင်း ထပ်ကာထပ်ကာ မိုက်လုံးကြီးခဲ့သည်မှာ၊ ငါ ဘုရားတောင် မကယ်နိုင်၊ ရှေးယခင်တွေ့ဖူးသော အာဠာဝက ဘီလူးသည်ကား ကျွတ်ချိန်တန်၍ ငါဘုရားချွတ်လို့ ကျွတ်ခဲ့ပြီ၊ မှတ်ထား လော့ ... အသင်သန်းအာဠာဝကရွှေဘီလူးချုပ်ကြီး..၊ သင်ကား … ”
ဟု စကားဖြတ်တော်မူပြီး၊ ပြန်ကြွတော်မူလေတော့သတည်း….။
အချိန်လွန်မှ ပုစ္ဆာအဖြေထုတ်ပါလေတဲ့ သန်းအာဠာဝကရွှေ ဘီလူးချုပ်ကြီးကား .. လားရာလမ်းသို့ ကြိုတင်မှန်းဆ၍ နွမ်းလျစွာဇက်ကျိုး၊ ယောယုဝသို့ အပြီးဂိုးသွားလေတော့သတဲ့။
ကဲ .. ပရိတ်သတ်တို့ရေ.. တရားစစ်တရားမှန်ဆိုတာ ဘယ်အခါမှမဖောက်ပြန်၊ ထာဝရတည်မြဲပါသတဲ့။ လုပ်စရာရှိတာတော့ လုပ်ကြရမှာ ပေါ့ ဗျာတို့ ..၊ ကျွန်တော်များဇာတ်ကိုတော့ နောက်နှစ်ပတ်မှ ပြန်ဆက်ပါတော့မယ်..၊ အားလုံးကျန်းမာတော်မူကြပါစေခင်ဗျာ..။ တိန် .. တိန် ..။
ဖတ်ဖူးမှတ်ဖူးခဲ့သည်များကို ပြန်လည်သုံးစွဲထားသည်များ ပါရှိကြောင်းဝန်ခံပါသည်။
လေးစားစွာဖြင့်
ပြောင်လျှာရှည်
သရဲနီတို႔ေပ်ာ္စံရာသို႔ --> (ပံုကိုႏွိပ္ေတာ္မူ)